زليم خان يعقوب او

زلیم خان یعقوب اف

 

ناحاق ائنديك او داغلارين باشيندان

گره ك اوردا قال اوغلي قال اولايديق

عؤمروموزو گؤل عؤمرونه دؤندريب

زيروه ده قار ، پتك ده بال اولايديق

 

آللاها تن ، حاققا ياردي زيروه لر

يارانيش دان دوم آق قاردي زيروه لر

عؤمروموزو اوجالداردي زيروه لر

ناحاق ائنديك او داغلارين باشيندان

 

اوفوق لرده قوش اولماق دا گؤزه ل دير

شيمشك لره توش اولماق دا گؤزه ل دير

لاپ او يئرده داش اولماق دا گؤزه ل دير

ناحاق ائنديك او داغلارين باشيندان

 

حاق ائوي دير هر داش اوتاق هر كاها

سالام وئرير دان يئرينه ، صاباحا

تئزه تئزه قووشوردوق آللاها

ناحاق ائنديك او داغلارين باشيندان

 

یازان رافیق  | ثابیت لینک |

سایین اوخوجولار ٬ چوخ سئوینیره م کی تورک اوغلان و قئز آدلاری خالقیمیزین طرفینده ن چوخ آختاریلیر . وار اولسون ائلیمی کی اوشاق لارینی اصیل تورک آدلارلا آدلاندیریر لار . بو گون ایکی پی دی اف فایلی سیز ایچون حاضیرلامیشام . تورک دیلینده اوغلان و قئز آدلاری . ... هئله لیک ...

 

تورک اوغلان آدلاری

تورک قئز آدلاری

 

یازان رافیق  | ثابیت لینک |

آنا یوردوموزو قاریش قاریش گزیب دولانسان ، آغ بیرچک آنالار و آغ ساققال آتالارین صوحبتی آیاغیندا اوتورسان ، اونلارین شیرین شیرین ناغیل لاری نی دینله سن ، گؤرورسن کی قدیم حکایه لر و افسانه لری نئجه خوش سویله ییرلر . تاسف له ایندی بو ناغیل لاری یالنیز کاغیذ لاردا و کیتاب لاردا گؤرمه ک اولور . نه ائله مک !!! ائله بودا غنیمت دیر ... بیزلره گره ک دیر کی بو ناغیل لاری کی آنا یوردوموزون شیفاهی ادبیاتی دئمه ک دیر ، قورییب سونرا کی نسیل لره یئتیره ک . ایکی ناغیلی سیزه تقدیم ائدیره م .


صداقت لی آرواد

یازان رافیق  | ثابیت لینک |

بو گون موغام موسابيقه سينين بيرينجي غاليبي گوللو موراد اوا دان نئچه ماهني حاضيرلاميشام . بو ماهني لار موغام موسابيقه سي نين چيخيش لاريندان حاضيرلانيب و انتحاف اولونور عزيز موسيقي سئور خالقيما ...

گوللو مراد اوا

گلدي باهارين صداسي ...

باخما منه گوله گوله ...

ساري گلين ...

قوربان اولوم او گؤز لره ...

یازان رافیق  | ثابیت لینک |

mp3 شعرلر 90/03/23 12:57

قشم ميرزه اوغلي نجف اف 1959 اينجي ايل آپرل آييندا " ايميشلي " رايونوندا آنادان اولوب . 1981 اينجي ايلده يونيورسيته دن ادبيات شعبه سيني بيتيريب .  حال حاضيردا آذربايجان يازيچي لار بيرليگي نين " آذربايجان " ژورناليندا شعر شعبه سي نين موديري و " تفككور " يونيورسيته سينده  باش معلم دير . آشاغي د ا كي لينك لردن اونون اوز ديليتده اوخونان شعرلريندن دانلود ائده بيلرسينيز .

ائشیت عزیزیم ...

بيلدين مي ؟ ...

مني آلدادايدين ...

یازان رافیق  | ثابیت لینک |

گلوبدور تنگه ای ظالم ، ستمله قان اولان کؤنلوم

همیشه باغ وصلینده ، گولوب خندان اولان کؤنلوم

دوشوب مجنون کیمی ، صحرایه بیر لیلی فراقیندا

بوتون عاشقلر ایچره ، منبع عرفان اولان کؤنلوم

نه اولدو بیلمه دیم دوشدو ، جدا گولزار کویوندان

همیشه خوان وصلین بزمینه ، مهمان اولان کؤنلوم

کیمه بیلمم ، گئدیب اظهار قیلسین محنت عشقین

دؤنوبدور قانه هيجرینده غمی پنهان اولان کؤنلوم

نه چاره ائیله سین ، بیلمم خلاص ائتسین اؤزون غمدن

اسیر محنت و پا بسته هيجران اولان کؤنلوم

اولورمی بیر زمان خرم ، یئتیشسه وصل جانانه

غم هجرینله افغانلار چکیب ، گریان اولان کؤنلوم

منم فرهاد ! عصرین سئودیگی واحيد  گوزل لر دیر

اودور کی لاله داغین گؤستریر ، ویران اولان کؤنلوم

 ****

زولفونده نه لازیم ، گؤزلیم ، شانه دولانسین ؟

قویما او حرمخانه نی بیگانه دولانسین

عیب ایله مه ، کویوندا دولانسام گئجه گوندوز

شمعین گرک اطرافینه پروانه دولانسین

ساقی دولانیم باشینا مئی جامینی گزدیر

سرمست اولوم ، باشیما میخانه دولانسین

اول زولفه کؤنول وئرمه ، دییرلر منه ال چک

اونسوز نئجه بس بو دل دیوانه دولانسین

مجنون نه برابر منه صحرالره قاچدی

عشق اهلی اودور عرصه ده مردانه دولانسین

اغیار ایله اؤز یارینی همدم گؤرن عاشیق

دوشسون او گره ک دشت و بیابانه دولانسین

سرخوش لیق ایله عؤمرونی صرف ائیله مه  واحید

عارف اونا دییرلر کی ، حکیمانه دولانسین

 

یازان رافیق  | ثابیت لینک |



·         وطنه گلدیم ، ایمانا گلدیم

·         گؤز سوز یاشاماق اولار ، وطن سیز یوخ

·         غریبی وورموشلار ، " وای وطن " دئمیش

·         غربت یئردن وطن اولماز

·         غربت گؤرمه ین آدام ، وطن قدرینی بیلمز

·         کؤچن یوردون قدرینی ، دوشن یئرده بیلر لر

·         ائل ایگیدلری ایله تانینار

·         ائل ایچینده ، اول ایچینده

·         ائل یاندیران شمعی سؤندورمه ک اولماز

·         ائل گوجی ، سئل گوجی

·         ائلی اولمایانین ، دیلی ده اولماز

·         ائلین آتدیغی داش ، اوزاق گئدر

·         اوزونی خالقا چئویره نین آرخاسی محکم اولار

·         بیرلیک هاردا ، دیری لیک اوردا

·         گوج بیرلیک ده دیر


یازان رافیق  | ثابیت لینک |

1969  اينجي ايلين نوامبر آييندا ، آذربايجان راديوسو ندا ايلك دفعه ائفيره چيخان " بولاق " وئرليشي استعدادلي يازيچي مولود سلیمانلی طرفيندن يازيليب عرصيه گليب . بو وئرليشين ايچينده شعرلر ، آتالار سوزو و مثل لر ، باياتي لار ، سازلي سؤزلر ، و بير باخيمدا آذربايجان شيفاهي ادبياتيندان نمونه لر گؤرسنير .   32 ايل ليك بير عؤمرو ياشايان " بولاق " وئرليشي 1993 اونجو ايله قدر ادبيات گروپو تركيبي نده فعاليت گؤستريب . بو وئرليشدن آلينان ايكي فايلي سيز ايچون حاضيرلاميشام . ايسترديم كي اوره ك وئريب ديقت له قولاق آسا سيز . سيزين فيكيرلري گؤزله ييره م .

بولاق وئرليشي ( بيرينجي حيصه )

بولاق وئرليشي ( ايكينجي حيصه )

یازان رافیق  | ثابیت لینک |

قيسا شعرلر 90/02/12 13:5

Sevginin yalnız
dadına baxa bildim.
Yemək istədim
Ayrılıqla doyuzdurdular...

سئوگي نين يالنيز

دادينا باخا بيلديم .

يئمك ايسته ديم

آیريليق لا دويوردو لار ...

Tək ürəyim yox!
Gözlərim gözlərin üçün,
əllərim əllərin üçün,
qulağım səsin üçün
darıxır...

تك اوره گيم يوخ !

گؤزلريم گؤزلرين ايچون ،

ال لريم ال لرين ايچون ،

قولاغيم سسين ايچون

داريخير ...

 

یازان رافیق  | ثابیت لینک |

مهستی گنجوی نین رباعی لری کیتابی نی pdf فورماسیندا و لاتین الفبا ایله یازیلمیش صورت ده آشاغی دا کی لینک دن آلا بیلرسیز .

مهستی گنجوی نین رباعی لری

یازان رافیق  | ثابیت لینک |

باخدیم دالیسیجا یار گئدنده
بیر یولدا دئدیم باخار گئدنده
باخدی قاپیدان کئچنده گولدو
بیلمیردی اوره ک اومار گئدنده
باغلاندی دیلیم اوره کده ن آمما
آز قالدی چئکم هاوار گئدنده
گئتمه گئدیسن ؟ یاواش – یاواش گئت
جانیم بیلی سن چیخار گئدنده
دؤندر گؤزونو خومار – خومار باخ
قویما منی ده ، خومار گئدنده
سن سیزلیگه دوزمه گیم چتیندی
گل جانیمی آل قوتار گئدنده
سندن سورا عشقی نئیلیرم من
آل عشقینی ده آپار گئدنده
مهر ائیله نوازش ائیله بلکه
گول بیتسین اورک ده قان گئدنده
من گؤر نه دئییردیم اؤز اؤزومنه ن
قول بوینوما بیر سالار گئدنده
بیچاره اوره ک بولود کیمین دیر
گؤردوکجه سنی دولار گئدنده
دای « جعفری » بسدی سیزلاما چوخ
سؤز اوستادی شهریار گئدنده
ایراندا هونر دیلنچی لیک دیر
باخما کی تاپار ویقار گئدنده

 

یازان رافیق  | ثابیت لینک |

راست تصنیفی

ماهور تصنیفی

 

یازان رافیق  | ثابیت لینک |


مطلب azpress سایتیندان کؤچورولوب .

خالق آرتيستي تارزن مهلت مسلم اف ، سيزي عادتا بئله تقديم ائديرلر ، بس اؤزونوز نئجه تقديماتدان راضي قاليرسينيز ؟

اول گره ك خالق سني سئوسين كي سونرا گليب اولاسان خالق آرتيستي . خالقين سئويملي سي اولمادان " خالق آرتيستي " اولماق كيمه لازيم دير ؟ ساغ اولسون خالقيم ، اؤزومون خبريم اولمادان ، گؤزومي آچديم ، گؤردوم خالق مني سئوير و دولتيميزده منيم زحمتيمه يئترينجه قيمت وئريب . صنعتكار اولماق اوچون ايكي عنصرون اولماسي خوشبختليك دئمك دير . شكورلر اولسون كي من هم خالق سئوگيسيني ، هم ده دولتين قايغيسيني حيس ائديره م . بودا  مني داهادا روحلانديرير . تار بئله صنعت دير كي اون ياشيندا اوشاقا دا ياراشير ، دوخسان ياشيندا اينسانا دا ياراشير . بونو اؤزومده ن دئميره م ، بيزيم اوستادلارين سؤزو اولوب ، قوربان پيريم اف ، ميرزه منصوراف ، احمد باكي خان اف ، اونلاردان بعضي لريني شكيل لرده ، ويديو يازي لاريندا ، بعضي لريني ايسه جانلي اولاراق گؤرموشم . قوربان پيريم اف ۸۰ ياشيندا ، تار سينه سينده شكليني گؤرموشم ، نئجه گؤزل ياراشير . تارا اونا گؤره "اولو تار" دئييرلر كي ، اوشاقا دا ، جاوانا دا ، گنجه ده ، قوجايا دا ياراشير . او كي قالدي منه ، آذربايجانين عادي اوغلو كيمي ، تارزن مهلت مسلم اف كيمي تقديمات داها خوش اولار .

مهلت معلم، اؤزونوز گنج ليك ايللري نيز حاقيندا دانيشسانيز منه ائله گلير هر كس اوچون ماراقلي اولار .

اوشاقليغيم چوخلاري كيمي عادي ، كاسيب ، فعله عائله سينده كئچيب ، من بو گون اوتانمادان دئيره م كي ، كاسيب عائله ده دوغولموشام . آما آتامين ، آنامين موسيقي يه اولان هوسي منده بو صنعته اولان محبتي آرتيريب . ايلك دفه تار آلتيني من آتامين دايي سي گيلده ، بينه قدي كندينده ، علعسگر دايي مين ائوينده گؤرموشم . همين واخت منيم هارداسا 4 – 5 ياشيم وار ايدي ، او گونده ن ده وورولموشام بو آلته .سونرا مكتبه گئتميشم . بيله جري ده كي 18 سايلي موسيقي مكتبيني بيتيرديم . سونرا دا آصف زيناللي يا قبول اولدوم ، 4 ايل اوردا تحصيل آلاراق اوراني دا موفقيت له بيتيرديم . سونرا اوزيير حاجي بي اف آدينا كنسرواتوريا دا قبول اولوندوم و اوراني دا بيتيرديم . 22 ياشيم اولماميشدي هئله ، مني آصف زيناللي آدينا موسيقي تكنيكومونا معلم وظيفه سينه دعوت ائتديلر . بو گون گؤرورسونوز كي كنسرواتوريا دا چاليشيرام ، اساس ايش يئريم بورا دير ، بونا باخماياراق آصف زيناللي ني اونوتمورام ، اوردا دا ايشله ييره م ، اونا گؤره كي اوراني آتا بابا اوجاغي حيس ائديره م . هر اورا گئدنده ، ائله بيليره م  احمد باكي خان اف ، حاجي بابا حسين اف و ميرزه منصور ون روحي اوردا دير . من دييرديم  شرق دونياسيندا ان بويوك موسيقي مكتبي دير ، همين مكتب .

مهلت معلم ، سيز فخر ايله اوستادلارين آديني چكيرسينيز ، بس گله جك ده ائله طلبه لرينيز وارمي كي فخر ايله سيزين آدينيزي چكه لر ؟

نه قدر آذربايجان خالقي وار ، نه قدر بو تورپاق وار ، بو صنعت ياشاياجاق . من آذربايجان ديينده تكجه 9 ميليونو نظرده توتمورام ، اوتاي دا 35 ميليون خالقيميز وار . اردبيله گئدنده ، اؤزومي وطنيمده اولان كيمي حيس ائديره م . والله اوتانيرام اؤزوم حاققيندا دئمه يه ، 30 ياشيم وار ايدي ، مندن 4 – 5 ياش بويوك تار ايفاچي لاري گؤروردوم كي مني يامسيلاييرلار . بير آز ياشا دولدوم ، گؤردوم بو حال داهادا چوخالدي . ايندي 55 ياشيم وار گؤروره م كي ماشالله چوخو چالير . گئديرلر منيم 25 – 30 ايل بوندان قاباق كي لنت يازيلاريمي قويورلار ، قولاق آسيرلار . طلبه لريمين هر بيريندن سوروشسانيز ، هئچ منيم طلبه م اولمايان دا ، بو گون منه مراجعت ائدير . البته مني ايسته مه ين لر ده وار ، الله اونلارين دا جانيني ساغ ائتسين ، آما اونو بيليره م كي ايسته ين لر ، ايسته مه ين لري اون دفه اوسته له يير . علي آقا واحدين بير كلامي وار " نادان سئومير سئومه سين مني ، قدير بيلن ميليون اهالي م وار منيم " يعني ميليونون يانيندا ، مين نفر ، ايكي مين نفر ده اولمالي دير . بو گونده تار ياشايير ، چاليشيرام كي تارا يئني نفس گتيريم ، نه قدر قلبيمده اوره ك وورور ، تار هئله سينه مده اولاجاق .

 مهلت مسلم اف دان بیر ایفا " ماتانی " آدیلا

یازان رافیق  | ثابیت لینک |

مهستی گنجوی 90/01/28 11:19

اون بيرينجي عصرين سونلاري و اون ايكي اينجي عصرين اول لرينده ياشاميش بويوك آذربايجان شاعره سي مهستي گنجوي آذربايجانين پارلاق صنعتكار و مغني سي دير .  مهستي هر صنعت ده بيرينجي ليك قازانميش دير . او ايلك مشهور آذربايجان شاعره سي ، ايلك شاهمات چي قادين ، ايلك گوركملي قادين موسيقي چي سي و چوخ احتمال كي ايلك قادين بسته كاريميز دير . روايت لره اساسا او گنجه نين "خرابات" محله سينده ياشاميش ، واختيني قوناق ليق لاردا موسيقي و رقص مجلس لرينده كئچيرميش دير . اونون شعرلرينده شراب و عشق دويغوسو ترنم اولونور .

شاعره نين اثرلري ايچره سينده گنجه نين خرابات محله سينده ياشايان گنج صنعتكارلارا ، درزي لره ، اييريجي لره ، قيزيل آختاران لارا و باشقالارينا حصر ائتديگي شعرلر سلسله سي داها چوخ مشهور دور :

 

دون كاشي كوزه مي داشلارا چاخديم

سرخوش ديم بيلمه ديم اليمدن سالديم

كوزه ديله گليب دئدي كي من ده

سنين كيمي ايديم ، بو گونه قالديم

بنزه ر، درزي اوغلو ، اوزون قمره

سنه يوز مهستي دونر چاكره

الينده كي ساپ تك يولوم دوشه كاش

شكر دوداقينا گونده مين كره

يون اييره ن اوغلان منيم جانيم دير

اونون زنخداني بير زيندانيم دير

اونون دوداقيندان بوسه وئر الله

چونكي او دوداق لار جان درماني دير

تورپاق اليين ين من عاشيقي ام

ديليم گلمير آچيپ سيرريمي دييم

او تورپاق ال له ييب قيزيل آختارير

من اليمده قيزيل اوني گزيره م

پاپاق چي سئوگيليم شوق ايله بياق

تيكيردي الينده اطلس ده ن پاپاق

هر پاپاقا يوز يوز آفرين دئديم

دوردونه بيري ده بس ايدي آنجاق

 

آذربايجان ادبياتي نين قدرت لي نماينده سي اولان مهستي گنجوي نين رباعي لري ، خاقاني و نيظامي اثرلري ايله باغلي اولماق لا ، دنيوي حس لر ترنم ائدير ، اينساني و اونون گوزه ل ليگيني ، آرزو و ايستك لريني ايفاده ائدير :

 

بير نال گوتوروب گلدي او نال بند اوغلان

نال وورماق اوچون اگيلدي قالديم حيران

كيم گؤردي بوجور معجزه ني عالم ده

وورسون هلال آت ديرناغينا بدر اوغلان !

                     * * * *

هرگاه كي گؤزومده ن ياشيم الوان توكولور

آغلار منه گوي ، ياشي بير عمان توكولور

سنده ن گؤزوم آيريلديغي گون قان توكدي

آيريلسا بدن دن باش اگر ، قان توكولر

                     * * * *

 شهلا گؤزون اي گؤزه ل باخسا مستانه

سرخوش دا گلر ، مي ده گلر افغانه

رقص ايله سه ساچلارين سنين بير لحظه

مين فتنه قوپار ، كونول گلر طغيانه

 

یازان رافیق  | ثابیت لینک |

یئنه گلدی باهار عطیرلی ، لاله لی غمزه لی نازلی نیگار

گئچدی عوموردن شاختا سازاقلی ، قارلی کولک لی ، غملی کدر لی گونلو قیشلار

بیر داها قارلی داغلار چیخاراجاق آغ کورکونو 

 گئیه جک یاشیل دونونو

 تاخاجاق دوشونه آل لاله لری 

توحفه وئرجک قوجاق قوجاق ... اتک اتک

مین بیر رنگ ایله بویانمیش لچک چیچک

بیر داها آخاجاق شلاله لر دامجی دامجی ، اینجه اینجه

نوروز گولو  قار چیچگی بویلاناجاق توپراقدان دویمه دویمه

بوز بولاقلار ارییب آخاجاق طبیعت یاناغیندا

سوزه جک جان تاپاجاق بولاق اوتو

گوله جک یاماجلاردا بوینو بوکوک بنو وشه لر

گونش ساری تئلرینی یایاجاق سینه سینه داغلارین

چیچک  قوناجاق آیلمیش بوداغلارینا آغاجلارین ، باغلارین

گوللر عطیر ساچاجاق دره لره ، داغلارا

باد صبا شانه چکر تئللره

خبر وئرر  اوبالارا - ائللره

نه یاتمیسیز دورون شادلیق ائدین فرح گلیب دیللره

بولبول اوخور سئوینج گلیر گوللره

قارلی قیشا سون دی  باهار

داغا یاشیل دوندی باهار

گولوش دی سانکی ، دوداقلارا قوندی باهار

سئوگیه باشلانیش حسرته سون دی باهار

 غملر آتار سئوینج قاتار

دورنالاری قاتار قاتار

چیچک لری لئچک لئچک

سئل سولاری آشار داشار

یئل اولوب داغدان اشار


یازان رافیق  | ثابیت لینک |

باهار گلدی ... 90/01/13 22:47

عطیر لرین قوجاغیندا ناز باهار

اوردوسونو گتیریب دیر بویانا

خوش قوخولو نوروز گولو ، بنووشه

لاله نرگیز یاییر  آذربایجانا



باهارین خوش نسیمیندن بو گون روحلاندی سونبول لر

دونوب بیر جنته یوردوم آچیلدی جور به جور گول لر

بوتون گولشن لره ای دل نیگهبان اولدو بولبول لر

یاشیل چول لر صفالاندی چیچک گولدو چمن گولدو


یازان رافیق  | ثابیت لینک |

تار کامانیم گل گل ...              ۷/۳ MB

الینه آینا آل ...                       ۴/۲ MB

یازان رافیق  | ثابیت لینک |


آرازام کوره بندم ...                       ۲.۱ MB

آی قیز سنه بیر سوزوم وار ...         ۱.۹ MB

یازان رافیق  | ثابیت لینک |

سو چرشنبه سی 88/12/04 9:22

 

چرشنبه یازین ، نوروزون ایلک قارانقوشی و مژده چی سی دیر . ایلین آخیر آیی نین  دؤرد چرشنبه سی نین ایلکی ، سو چرشنبه سی دیر . بو گون سو چرشنبه سی دیر . دییرلر تانری هر شی دن قاباق سویو یارادیب . سو حایات منبعی و مقدس دیر .سو چرشنبه سینده ائلیمیزین قیزلاری آخشامدان ال لرینه آیاق لارینا خئنا یاخار ، تئل لرینی دارایار ، بزنیب دوزه نردیلر . مخصوص اولاراق قاباقجا دان بایرام اوچون آلدیقلاری تزه پالتارلارینی گئیینر ، سحر تئزدن بزه کلی دولچا سنک لری نی چیینلرینه آلیب بولاخ باشینا گئدرلر . قیز اوره گی کیمی تمیز ، بلور کیمی صاف ، هاوا کیمی شفاف ، بوز کیمی سرین سویون رمزی اولان سو ، چرشنبه آخشامی سفره یه قویولماق لازیم دیر . قیزلار بولاخدان گتیردیکلری سودان ائوین اطرافینا دؤره سینه سپرلر . بؤیوکلی کیچیکلی هامی بو سودان اوزونه چیله ییر .تونقالی اود چرشنبه سینده آلیشدیرسالاردا ، سو چرشنبه سی ده اودسیز اوجاق سیز اولماز . چؤن کی سو چرشنبه سی سویوق قیشدان سونرا ، اود نفس لی یازین یایین گلیشیندن خبر وئریر . هرکس اؤز قاپیسی نین اؤنونده ، حیطینده خیردا تونقال لار قالاییر ، یومورتا دویوشدورور . هر چرشنبه نین ده اؤز خوره کی ، اؤز خونچاسی وار . سو چرشنبه سی خونچاسیندا بولاقدان ، قویودان ، کهریزدن گتیریلمیش تمیز سو مطلق اولمالی دیر . دوره سینه قورو میوه ، رنگ برنگ شمع لر ، لب لبی ، کیشمیش و چتنه لی کنجدلی فندق لی قوزلی قوورقا قویارلار . یاشلی لاری دا اونوتمازلار اونلار ایچون قوورقادان قاووت چکیب اوستونه بال توکرلر . هر خانیم اؤز ذوقینه گوره خوره ک بیشیرر : سودلی پولو ، قیساوا ، لوبیه چیلو ... بونو دا دییم کی چرشنبه لرده یاس یئرینه ، حضوره ، غم ائوینه ، قبر اوستونه ده گئتمزلر .

یازان رافیق  | ثابیت لینک |

باهار گلیر ... 87/12/15 11:27
 

کپنک لر گولدن گوله قونورلار
باهار گلیر پنجره نی باغلاما
بنوشه لر کردیمیزه دولورلار
بولاغ آخیر سن گؤزه لیم آغلاما

یئنه قالدی اوزو قارالیق کؤموره
ظالیم شاختا ساراییندا گول بیتیر
ایلیق یئللر اسیر سئزاق یئرینده
یاز چمنده آچیب چیچکدن چتیر

گول دردیمیز بوزا دؤنوب اریسین
خزان وورموش آرزی باغی گول آچسین
یاز گتیرسین یئنیلیک ین نغمه سین
کؤنول لرده اومود دالی زوغ آتسین

گول اوچوشسون دوداق دوداق دردیمیز
سئوگی سئلی سارسین عومور یوللارین
کؤلگه لرده سارالماسین گولوموز
اسیر تورپاق دادین آلسین باهارین

یازان رافیق  | ثابیت لینک |

شاعیر میرزا علی معجز شبستری تبریزین شمال شرقینده واقع اولان شبستر شهرینین اهلی دیر . او 1252 شمسی ایلینده آنادان اولوب و حاجی آغا آدلی بیر تاجیرین اوغلی دیر . میرزا علی تحصیلاتین بیر کؤهنه اصول مکتبینده مشغول اولموش و اؤز یازدیغینا گوره آتاسی اونون 16 یاشیندا اولان زامان وفات ائدیب و قارداشلاری اونی استانبولا دعوت ائتمیشدیلر . معجز استانبولدا چوخ حکایت و ادبیات و تاریخ صاحه سینده یازیلان رمان لارین اوخوماقی ایله مشغول اولموشدیر . معجز 30 یاشا چاتاندا غربتی ترک ائدیب و اؤز وطنی شبستره مراجعت ائتمیشدیر و ان عزیز اوقاتینی شیخ محمود شبسترلی نین توپراغی کناریندا کئچیریب و شعر یازماغا مشغول اولموشدیر .

اثرلریندن واضح گورونور کی شاعیر اجتماعی حیات باره سینده بؤیوک و گؤرکملی آددیملار گوتوروب . مثلا دئیر کی :

چون قاییتدیم وطنه آچما دهانین دئدیلر

دینمه دانیشما و ترپتمه زبانین دئدیلر

دئدیم اللاهه باخین ائتمه یین  آخر اولدوم

گر بوجور ائتمیه سن چوخدی زیانین دئدیلر

شاعیر اوز زندگانلیغیندا بئله یازیر :

"وطنه قایداندان سونرا یوردومون حالینی گؤروب نوحه خوانلیغا باشلادیم ! منیم نوحه خوانلیغیم آخوندلارین خوشونا گلمه دی و منه محاربه اعلانی ائتدیلر . 26 ایل ووروشدوم . خیرات وئردیلر منی دعوت ائتمه دیلر ، طوی اولدی منی چاغیرمادیلار ، یعنی یازدیم و گوشه کناردا باشا آپاردیم ."

او اؤز شعرلرینده خرافات اصول لاری و جهالت و ظلالته سوق ائدن عادت و مرض لری تنقید ائدوب ، اینسانلاری یاخشی شرح لر و گؤزل شعرلر وسیله سی ایله مدنیت و اجتماعی حقوق سمتینه سوق ائدیب و هئچ بیر زاددان قورخوسی یوخموش .

شعرلریندن نمونه لر عزیز اوخوجولاریما تقدیم اولونور ...


یازی نین آردی
یازان رافیق  | ثابیت لینک |

بیلمیرم عاشیق زلفیه حاققیندا ائشیتمیسیز یا یوخ ... خیلی گزدیم کی بو باره ده بیر سیرا معلومات تاپیم آما تاپاممادیم ... یالنیز گوروب ائشیتدیگیم بو دور کی گوزل ساز ایفاچی سی اولاراق حزین بیر سسه ده صاحیب دیر ... دینله یین ....

آ جیران                      8/1 MB   

گوزلریم                      7/2 MB

یازان رافیق  | ثابیت لینک |

کونول خاسی اوا دان ایکی ماهنی تقدیم اولونور بوتون موسیقی سئور خالقیما ....

گوزلریمه باخان گلسین               2.6 mb

یارب منیم صبریمی وئر               2.3 mb

 

 

یازان رافیق  | ثابیت لینک |

 

اوستاد شهریار

يیغدی خير و بركت سفره سين ، احسانیله گئتدی
امن امانليق دا يوكون باغلادی ، ايمانیله گئتدی

بيگ خان اولمازسا دئيه رديك اولاجاق كنديميز آباد
او خراب كتده ، و لاكن ائله بيگ خانیله گئتدی

(سيلو) داير اولالی ، هر نه دگيرمان ييغيشيلدی
آمما خالص تميز اوونلاردا ، دگيرمانیله گئتدی

مستبد سلطاني سالدوق ، كي اولا خلقميز آزاد
سونرا باخديق كي آزادليق دا او سلطانيله گئتدی

بير (بلی قوربان!) اولوب ايندی بيزه مين بلی قوربان
آمما (خلعت وئرن) اول بير بلی قوربانیله گئتدی

دوز مسلمانه ديئيرديك : قولاغی توكلو دی بدبخت
ايندی باخ ، گور كی او دوزلوك ده ، مسلمانیله گئتدی

وئرمه (صابر) دئدی ، او دولما فسنجانی آخوندا
آغزيميزدان دا داد ، اول دولما  فسنجانیله گئتدی

دئدی انسانيمیز آزدير ، هامي انسان گرك اولسون
آمما انسانليقمزدا ، او آز انسانیله گئتدی

بو قدر (دفتر) و (اسناد) له ، بير حقه چاتان يوخ
حق وئرنلر (پيتيگي) ميرزا قلمدانیله گئتدی

بيزه بير دين قالا بيلميشدي ميراث ، بيرده بو ايران
دين گئدنده دئدی : " تك گئتمه رم! " ايرانیله گئتدی

ايسته ديك قانلا يوواق ئولكه ميزين لكه سين ، آمما
ئولكه ميز خالص ئوزی لكه اولوب قانیله گئتدی

يورقانی اوغری قاپاندا ، دئدی ملانصرالدين :
نيله سين چيلپاغيدی ، اوغري دا يورقانیله گئتدی

هاوا انسانی بوغور باش باشا " گاز كربنيك " اولموش
يئل ده اسمير ، ائله بير ، يئل ده سليمانیله گئتدی

سو ، كرج دن " كلور " ايله گلی پاسلی دميرده
گوره سن " شاه سويی " تك چشمه نه عنوانیله گئتدی

تركی اولموش قدغن ، ديوانيميزدان دا خبر يوخ
"شهريارين" ديلی ده وای دئيه ، ديوانیله گئتدی

 

یازان رافیق  | ثابیت لینک |

هر زامانکی باخیرام باشینا قار وار گورورم                   

اوغول اولموش آتا تک گوزلرین آغلار گورورم

هر طرفدن چکیلیب سینه وه داغلار گورورم                 

آی آلان اوستونو غم چیسگینی ، هر یانی دومان

آی یاغان باشینا غملر اودو ، یاسلی ساوالان


گورموشوک یازدا کوچک لرده چیچکلر آچیلار                  

هر طرفدن چیمنین سینه سینه گول ساچیلار

ماهنی لار قوشماغا باشلار یئنه ده قوشماچیلار          

یاز گلیب گئتدی یئنه گولمه دین اوچ آیدا بیر آن

آی یاغان باشینا غملر اودو ، یاسلی ساوالان


قرنیلر گئچدی سنین گولمه دی بیر لحظه اوزون         

قانلی یاش توکدو سارالمیش اوزونه یاشلی گوزون

غصه دن دوندو قارانلیق گئجه اولدو گونوزون               

نه سوران حالینی اولدی نه وئرن جیسمیوه جان

آی یاغان باشینا غملر اودو ، یاسلی ساوالان


آند وئررم سنی او قانه بلنمیش داشووا                       

گئجه گوندوز او گوزوندن توکولن قان باشووا

اورگین دردینی بیلدیر او "سهند" قارداشووا                  

سنی وارلیق  سنی تانری  سنی بو آه و فغان

آی یاغان باشینا غملر اودو ، یاسلی ساوالان


سالارام یادیما بیر لحظه او گئچمیش لریوی               

توکولن سنگ جفائیله او دور دیشلریوی

ایزلرم بیر بیر او حئیرت یارادان ایشلریوی                    

هامی دان من سنین احوالینا آرتیق نیگران

آی یاغان باشینا غملر اودو ، یاسلی ساوالان


ساکیت اول ، آغلاما قوی بیرجه چکیلسین بو دومان      

گون چیخیب ظولمنی بیر یوللوقا قووسون بورادان

"نبی" گلسین ، بو آت اولسون یئنه داغلار آتیلان          

"هجر"ین بلکه یغیلسین گوزو یولدان ، آناجان

آی یاغان باشینا غملر اودو ، یاسلی ساوالان


سوندوره بیلمه دی گوز یاشین اورکدن اودووی              

چاغیریم قوی کومک ائتسین سنه اوز اولادیوی

افتخاریله بوگون ذیکر ائدرم پاک آدیوی                         

مرد اوغوللار بئجریب خلقه وئرن شوهرت و شان

آی یاغان باشینا غملر اودو ، یاسلی ساوالان


"بابکین"گئتدی سه بوش قالمادی آمما قوجاغین             

دولودور مین ائله اوغلانلاریلا هر بوجاغین

نه قدر یئل اسه طوفان قوپا سونمز اوجاقین                    

ای بلالر سپری ، خالقا یامان گونده آمان

آی یاغان باشینا غملر اودو ، یاسلی ساوالان


چنلی بئلده "ده لی لر " قوی یئنه قورسون بوساطی         

قوچ کوراغلو یئنه جولانه گتیرسین قیر آتی

هئچ زامان اصلین ایتیرمز او کی دوزگوندی ذاتی             

آند اولا آدیوا ، آی گوزلری آغلار ، یاشی قان

آی یاغان باشینا غملر اودو ، یاسلی ساوالان


سن دویوشلرده بیر آسلان کیمی دوردون ایاغا                

اوخ آتیلدیقجا بیزه سینه نی وئردین قاباغا

غم یئمکدن داها جانیم یئتیشیب دیر دوداغا                   

نه یامان گونلره گور قالدی بو احساسلی بالان

آی یاغان باشینا غملر اودو ، یاسلی ساوالان


بابالاردان بیزه قالمیش بو مثل هاممی بیلر                   

سو ٬ گلن آرخا دئیبلر یئنه بیر گون سو گلر

فلکین داش اورگین آه اوخو آخیردا دَئلر                         

"بارز" اوغلوندا یئتر سئودیگی یاره او زامان

آی یاغان باشینا غملر اودو ، یاسلی ساوالان


یازان رافیق  | ثابیت لینک |

 بیرجه ایچیملیک سو ، بیر اووج تورپاق
بیر چینار کؤلگه سی ، بس ائدر منه
بیر لطیف بنؤوشه ، بیر یاشیل یارپاق
حزین بیر نئی سسی بس ائدر منه
...
بیر سونبول دنه سی ، بیر آیدین سما
بیتمز بیر خاطرات بس ائدر منه
بیر حسرتسیز عمور ، بیر سونسوز وفا
بیر عمورلوک حیات بس ائدر منه
...
بیر کؤرپه گولوشو ، بیر توی صداسی
بیر دوست صداقتی بس ائدر منه
بیر قارانقوش سسی ، بیر یاز هاواسی
بیرده ائل شفقتی بس ائدر منه
...
یازان رافیق  | ثابیت لینک |

بو وبلاگ دا یازیلان آذربایجان ادبیاتیندان سئچیلمیش نمونه لری بیر ال تلفونی ایچون فایلدا حاضیرلامیشام . سونی اریکسون ال تلفونی و نوکیانین بعضی مدل لرینده تست اولونموش دور . بو کیتابی حاضیرلانان لینک ده یوکله یه بیلرسینیز .

آذربایجان ادبیاتی نمونه لری ال تلفونی ایچون   121kb

یازان رافیق  | ثابیت لینک |

یئنی ایل ده شادلیق لار ، سالامات لار ،گولر اوزلر آرزولییرام سیزه ...

ایشالله بو ایل آذربایجانیمیزا برکت لی اولسون ...

شاد یاشایین

یازان رافیق  | ثابیت لینک |

سارا بیر آیدی بیزیم ائللره، آیسیز گئجه لر

بیر اوجا سسدی قولاق وئر اونا هایسیز گئجه لر

سارا بیر باغدی طبیعتدن آلیب قول بوداقی

بیر شیرین ماهنیدی یانلیز اوخویار ائل دوداقی

سارا بیر قیزدی سودان سورمه چکیب گؤزلرینه

جان دئییب بیرده اورکدن آرازین سؤزلرینه

سارا سئودا ایله دونیانی آتان بیر قیزدی

سارا غملر اوجاقینادا آلیشان بیر کؤزدی

بیر نجابتلی گلین دیر ائله آسلان سایاغی

قویمادی تار ائده دونیاسینی چاققال آیاقی

اؤزونو آتدی سئله اؤزگه نی حئیران ائله دی

او یانان شمعینی پروانه یه قربان ائله دی

قوشولوب سئللره گئتدی آنا یوردون ساراسی

قالدی شیرین اوره گینده یئنه فرهاد یاراسی

باغلادی ساچلارینی قویمادی بیگانه گؤره

آنا یوردون قیزی وئرمز ساچین هر کیمسه هؤره

گلین اولدو آرازا، اوردا تویون توتدو سارا

سؤیله دی اوردا اورک سؤزلرینی نازلی یارا

آراز آغلار گؤز ایله، آلدی سارا اللرینی

دارادی ائل قیزینین بیرده قارا تئللرینی

گئتدی گؤزلردن اوزاق دوشدو ائلین بیردنه سی

گؤرمه دی خان چوبانین آیریلیقین سون نفسی

سارا گؤزلردن اوزاق دوشسه ده ایتمز اثری

بیر یاراق تک سؤزونون واردی هله چوخ کسری

یازان رافیق  | ثابیت لینک |

ایکیمیزده بیر اورک وار

                     یاری منده ، یاری سنده

سئوگی آدلی بیر آغاجیق

                     بوداق منده ، باری سنده



چیچک بیتر گول اوزونده

مین معنا وار هر سوزونده

بیر بولودوق گوی اوزونده

                    یاغیش منده، دولی سنده




بیراووچویام گوزوم اوودا

قاچ ها قاچدا ، قوو ها قوودا

عومروموز بیر شیرین سئودا

                   پتک منده ، بالی سنده

یازان رافیق  | ثابیت لینک |

لايلالار آنالارين اوشاقلاري ياتيرتماق اوٍچون اوْخودوقلاري شعرلر دير.آذربايجان لايلالاري فورم

باخيميندان باياتي كيميدير . لايلالاري باياتيلار دان فرقلنديرن جهت ايسه اونون مضمونو دور . فورم

باخيميندان دا بير كيچيك فرق اؤزونو گؤسترمكده دير. اگر باياتيلارين اوّلي "عزيزيم" ، "من عاشيق "

، "عاشيغام" سؤزلريله باشلاييرسا ، لايلالار دا "لايلا" سؤزو يا "لايلا دئديم، لايلا دئييم "

سؤزلري گلير.

ايندي ايسه لايلالاردان بير نئچه سینی بوردا گتیریره م :


لايلا دئديم ياتاسان

قيزيل گوله باتاسان.

قيزيل گولون ايچينده

شيرين يوخو تاپاسان.


لايلاي بئشيگيم لايلاي،

ائويم ائشيگيم لايلاي

اوزون گئج هلر بويو

چكيم كئشيگين لايلاي.


لايلاي دئديم اوجادان

سسيم چيخمير باجادان

تانري سني ساخلاسين

چيچكدن ، قيزيلجادان .


لايلاي دئديم ياتينجا

گؤزلرم آي باتينجا

جانيم دوداغا يئتدي،

سن حاصيله چاتينجا.


لايلاي دئديم، جان دئديم،

يوُخودان اوْيان دئديم.

سن يوُخودان دوُرونجا

جانيمي قوربان دئديم.


لايلاي دئديم ياتاسان

شيرين يوخو آلاسان

شيرين يوخو ايچينده

مني يادا سالاسان.


بالامين يوخوسو گلير

لايلايي نين سسي گلير

اوزاق-اوزاق داغلاردان

بالامين داييسي گلير


لايلاي منه قالان لايلاي

شيرين ديللي بالام لايلاي

یازان رافیق  | ثابیت لینک |

ساوالان...

اوچور ایلهامیم او قوشلار کیمی کی
یاز وعده سینده
قوزانیر ماوی گویه تا اوجا باش بیر داغا قونسون
کورپه قارتال کیمی دیر
گاه چکیلیر گوزده ن ایتینجه ک
اگله نیر گاه ساوالان عشقینه _آغدان_آغا قونسون
هر اوجا داغ کی گوروسن باشی قاردا آغاراندی
اورا بیل کی ساوالاندی
آمما یوخ!
هر اوجا داغ سسیمی آلسا دا تئز قیته ره جکدی
سسی قیته رمک همان یئل بیله جکدی
آخی یئل یولچو دو گئتگین اوکی سوز ساخلایا بیلمز
یئل سوزو قاپدی قاچیردار اونو کیم هاخلایا بیلمز
یئل گئدر گیندی پیچیللار سوزو کوللار قولاغیندا
سوزو قربان ائله یر قیرنادا قانقال آیاغیندا
چئویره ر سوز چاناغیندا
جالایار داغلارا هر بیر سوزو مین سوز توره دندی
بیلمیرم سیرری ندندی
یئل گئده ر گیندی یئلی ساخلاماق اولماز
یئله بئل باغلاماق اولماز
آمما سن ای سوزو سینه نده کوزردن ساوالانیم
کیم گله صدقله زرتشت بئجردن ساوالانیم
ائلیمین شانلی داغی باباشیوا مین لر جه دولانیم
اریدیب ائل غمی بیر یول سنی کوکدن ده تالانسان
سئل اولوب قانلی دنیزلر کیمی دونیایه جالانسان
آدی دیللرده قالانسان
ساوالانسان،ساوالانسان
ساوالان ائل غمینی بللی دی ساخلار سینه سینده
سینه سی کوزدو آلودور گیزیلیک اینسی سی واردیر نفسینده
شاعرین غملی سه سینده آلگیلان ساخلا سن ای ائل داغی غملی قفسینده
ساوالان آلسادا هر سیرری سوزو داغلارا سالماز
گوره نامرد دوروبدور ساوالاندان سس اوجالماز
ساوالاندا توکولن داشلاری دیندیر دانیشالار
سالسا عاشیق نفسین کوللارا،کوللار آلیشالار
ده ده قورقود سازی چالسا
ده لی دومرول باش اوجالدار
بلی البته کی یولداش باشینی یولداش اوجالدار
سسله عاشیق سازی چالسین
سسی میز بیرده اوجالسین
اویناماق لیزگی یه دونسون
کاس شوشم گوزگویه دونسون
قوی وئرک سس سسه باهم اوخویاق بیرده کوراوغلو دلی سیندن
هجرین قوچ نبی سیندن
اوکی ظالیملری مظلوملارین اوستونده ازه ردی
او کی آسلان کیمی داغلاردا یاتیب باغدا گزه ردی
اوخو عاشیق اوخو
سن بیل اوکی تانری تانییبسان
سوزومه دوز جالییبسان
سوگوم قوی سازا گلسین
بولبولوم آوازا گلسین
یازمیشام ایوازا گلسین
گوج آلاق قوی دلی لردن
باج آلاق اجنبی لردن
اوکی بیلمیر نبی کیمدیر قویون آذر ائلینی مسخره سانسین
بیر عومور دورکی فضولی نی -نسیمی نی دانیب ایندی ده دانسین
شهریار تک سن اوجات باشیوی قوی عرشه دایانسین
قوی باخار کور تر ایچینده جوموبان اولسون -اوتانسین
اوکی آخساخدی یوبانسین
اوکی تورکون دیلین اسگیتمه گه تصویره سالیبدیر
اوکی تورکون بالاسین ایندی ده آشغالچی سانیبدیر
او تفاله بیلیرم فیکرینی طاغوتدان آلیبدیر!!
او رژیمیندی قالیبدیر
یوخسا تورکون بالاسیندان چیخیب علامه ی دوران
اونا دونیا باش اییر فلسفه ده
بیرجه نه ایران
قوی دئییم شهریاریمدان
نیسگیل او چرچی یه قالسین کی جواهیر نه دی، قانمیر!!
فیکری آللاتما دادیر خالقی ،ائلین حالینه یانمیر
اریمیر،اولمور،اوتانمیر
آخی ای قاردا،دوماندا باش اوجالدان ساوالانیم
غمی ،دونیانی قوجالدان ساوالانیم
ائل بیلیر داغلار آرا هر اوجا داغلار باشی سن سن
وئر سهنده الیوی قارداشیوین سیر داشی سن سن
وئر گیلن بیر لیک الین بیرده دماونده اونون یولداشی سن سن
اوندان آیریلما آماندی
یولوموز چندی دوماندی
قوی ایگیدلر سیزه فخر ائلیه ییبن باشین اوجاتسین
قویما قارتال دولانان یئرلره قوزغون الی چاتسین
ساوالان چنلی چاغیندا
منیم ایلهامیم اولارکن
کونلوم اوز سری سوزون صدق ایله سویلر ساوالانه
ساوالان کوز قالادار شاعیر اولانلار سینه سینده
اوردا زرتشت گئدیب تانریدان ایلهامین آلانه
اگیرم باش ساوالانه، اگیرم باش ساوالانه
یازان رافیق  | ثابیت لینک |

قــیزیل گونش گوی اوزونده گـولنده،

نغمه سینی قوشلار باغ- باغ بـولنده،

من گوز آچـــیب، بو دونـــــیایا گلنده،

بخت اولدوزوم بورادا یانان اولوبدور

ایلک بئشیگیم آذربایــجان اولــوبدور
بو شعرین آردی وار ....

یازی نین آردی
یازان رافیق  | ثابیت لینک |

بير گون واريدي بير گون يوخ. سيز تانیماييب من گورمين اولکه لرين بيريسينده بير عاغيلي شاه وارميش. گونلرين بير گوني شاه وزير ساراي آداملاريله  بيرليکده دولان گرديشه چخيب يول لاري اوستونده بير قاري قوجاکيشي یه راست گليرلر.

شاه يانينداکي لارين ان عاغيلي اولانيني تانيماق اوچون بير آز فيکيرلشيب سونرا قوجانين يانينا گئدير ودئير کي : آي دونيا گورموش کيشي سندن اوچ سواليم وار سوروشسام جواب وئررسن؟

قوجا دئير : بيلسم جوابيني وئررم بيلمه سم اورگشره م ...

شاه دئير : آ قوجا دئ گوروم ايکيني اوچ ائلميسن؟

قوجا دئيير: بلي ،قوربان!

شاه دئيير: اوزاقي ياخين ائلميسن؟

قوجا دئيير: البت کي!

شاه دئيير: نئچه يول تالان اولوبسان ؟نئچه يول تالان ائیله ميسن؟

قوجا دئيير: اوچ يول تالان اولموشام ايکي يول تالان ائيلميشم!

شاه قوجايا احسنت دئييب، بوللي خلعت وئريب يوللارينا دوام ائديلر. اوتراق ائیلين يئرده شاه آداملارين بير آرايا يغييب دئيير کي: کيم دئيه بيلر کي من قوجادان نه سوروشدوم ؛ اودا منه نه جواب وئردي؟

هيچ کيم جواب تاپمادي ،هامي هويوخوب قالديلار کي نه دئسينلر. شاهين وزيري اردان چخيب تئز قوجانين يانينا گئديب دئيير کي: آ قوجا آتا ، شاه وئرن خلعت لرين تايین سنه وئررم دئ گوروم شاه نه سوروشدي ؟سنده نه جواب وئردين؟

قوجا بير آز گولوب دئدي:من خلعت ايستميرم.ياخشي قولاق آس...اوندا کي شاه مندن سوروشدي ايکيني اوچ ايله میسن منده دئدیم هه ! شاهين منظوري بو ايدي کي ايکي اياقين اوچ اولوب ! منده دئديم ايکي اياقيما بيرده چليک آرتيب ، اوندا کي شاه دئدي اوزاقي ياخين ائديبسن منده دئديم البت ! شاهين منظوري بو ايدي کي اوزاقي داها گورنميرسن چون قوجالميسان. اوچونجي سوالين جوابيدا بو جوردي کي شاه دئدي نئچه تالان اولوبسان ؟نئچه تالان ائليبسن منظوري او ايدي کي نئچه دفعه قيز اوغلان ائولنديرميسن ؟منده دئديم اوچ قيز اره وئريب اوچ يول تالان اولموشام ، ايکي اوغلان دا ائولنديريب ايکي دفعه ده تالان ائیله ميشم.

وزير درحال شاهين يانينا دونوب جوابلاري شاها دئيير.

یازان رافیق  | ثابیت لینک |

عزيزيم كيمي گوزلر
تار چالان كيمي گوزلر
قاشون كيمي قاش اولماز
گوزلرين كيمي گوزلر

***

بو داغدا مه‌لر گلر
داغلاري انر گلر
نامرده توش اولانين
باشينه نه‌لر گلر؟

***

بو داغدا اكديم اكين
آلديلر اليمده كين
هيچ كافر هيچ مسلمان
اولماسين منيم تكين

***

بير قوش گلير آغ داشدان
خبر ويرير قارداشدان
قارداش باجيدان دويسا
باجي دويماز قارداشدان

***

بو گلن اوزون بيلمز
دانشسا سوزون بيلمز
هر گليب سو دولدوران
چشمه نين گوزون بيلمز

***

بوستانام تاغيم آغلار
غمدن ياپراغيم آغلار
ساغام اوزوم آغلارام
اولسم توپراغيم آغلار

***

بو دره نارين دره
گيتديكجه نارين دره
بوردا بر باغ سالديم
يار گله نارين دره

***

آي چيقدي قادر آللاه
تقصيريم نه در آللاه
يا منيم سووگوليمي
يا مني ئولدور آللاه

***

آغ آلما قيزيل آلما
نيمچه يه دوزول آلما
چيركين آل نجيب اولسون
بد اصيل گؤزه‌ل آلما


یازان رافیق  | ثابیت لینک |



آذربایجان ماهنی سی   2/96Mb           مغنی : سامی یوسف
 
یازان رافیق  | ثابیت لینک |

یوبانمیشام 87/06/10 8:55
دولدور پیاله نی وئر ایچیم، چوخ یوبانمیشام

ایللر بویو بو جامیدن اوتری دولانمیشام

گورجک سنی ، تمام وجودوم سن اولموسان

سنسیز ولی ، اوزومده اوزومدن تالانمیشام

سنلی گونش لریم منی ایزلیر آداخلی تک

نئیلیم من عاشقم ، سنی تکجه اینانمیشام

عشقیم یالان دئییل منه بیگانه سویله مه

مجنون کیمی دالینجا گزیب چوخ دولانمیشام

سنسن منیم ازل سوزومون سون حکایتی

سن ناز ائله ، کی من سوزوم اوسته دایانمیشام

عالم بیلیر کی اوزگه خیالی باشیمدا یوخ

عشقیم بو دور کی عشقین ایچون چیرمالانمیشام

من وار یوخو اودوزسام اگر سنلی گونلره

یوخدور غمیم کی سنله حیاتی قازانمیشام

قوی باشیوا اوزوم دولانیم مین نیازیله

یاندیر یانیم کی یانماق ایچون گر یارانمیشام

بیر گون گلر دئیر کی « سامع » ده گئتدی گل

گئتماق گرک ، قالماغا واخت یوخ ، یوبانمیشام

 

                                                                           عزیز دوستوم ایل قیزیندان تشکورلر

یازان رافیق  | ثابیت لینک |

هاچان، بیرده، گورم سنی

آنا یوردوم، آنا وطن

گول اوزووه، حسرت قالیب

سن سیز، گلدیم جانا، وطن

مین داوادا، مین دویوشده

بولاشمیسان قانا، وطن

کیم دور سنه، ایری باخا؟

کیم دور، سنی دانا، وطن؟

جانیم اولسون، سنه قربان

آذربایجان، آذربایجان

   

 


بسله میسن قوجاغیندا

حیدرخان تک، قهرمانلار

دیواریندان، داشلاریندان

توکولوبدی، سئل تک، قانلار

کوراوغلونون، نعره سیندن

قورخوب، قاچار، شاهلار، خانلار

خلق میزه، ایلهام وئریر

آدلی، سانلی، ستارخانلار

ایگیت اوغلون، حسین باغوان

آذربایجان، آذربایجان

 



آخشام چاغی، اوبالاردا

سرین سرین، یئل لر،اسر

گدیک لری، دوتوپ دومان

دره لرده، قوزی،مئلر

باغچالاردا، عاشق آلما

داغلاریندا، جیران، گزر

آلمالاری، آغاجلاردان

خمار گوزلی، قیزلار، د ره ر

هرطرفین، باغ دور، بستان

آذربایجان، آذربایجان



تاریخ لره، سالدیم نظر

وار سنده، مین لر،قهرمان

بابک لره، اولموش وطن

ستارخاننان، قالمیش نشان

داوا گونی، میدان لاردا

دوشمن لره، قارشی دوران

دوشمن، اگر ئولدورسه ده

ال چکمه رم، سندن، اینان

سن سن منه، روح وروان

آذربایجان، آذربایجان

                                                           شاعیر"حسن جداری"

یازان رافیق  | ثابیت لینک |

گوزلرین ... 87/04/23 17:59
چکیر وارلیغیمی دارا گؤزلرین،
آپاریر روحومو هارا گؤزلرین،
قارا بیر محبس دیر قارا گؤزلرین،
بوراخ گؤزلرینین حبسیندن منی.


                                  یاندیریب یاخماقدا اؤد قودرتی وار،
                                   تکجه من بیلیرم نه حیددتی وار،
                                  آخی، جزانین دا بیر مدتی وار،
                                  بوراخ گؤزلرینین حبسیندن منی.


قالدیم جاذیبه نده بیهوش کیمی یم،
مرحمت گؤزله ین باخیش کیمی یم،
قفسه سالینمیش بیر قوش کیمی یم،
بوراخ گؤزلرینین حبسیندن منی .

یازان رافیق  | ثابیت لینک |

بیر اوشاغام، آنام سن سن
خسته اولسام، داوام سن سن
آغاج اولسام، هاوام سن سن
اورک ائویم سنسیز تالان
آنا یوردوم، آذربایجان


جئیران اولسام ، سن داغیمسان
بولبول اولسام ، سن باغیمسان
سونبول اولسام ، تورپاغیمسان
سرین سولار ، سند ن آخان
آنا یوردوم آذربایجان


آغ بولوتلار ، یور قانیندی
مرد اوغوللار  قوربانیندی
یول گورسدن ، قورآنیندی
دوشمن لری ، درده سالان
آنا یوردوم آذربایجان


من آرازام ، سن خزرسن
آغیزلاردا ، چوخ گزرسن
هر آفت دن ، بر حذر سن
قار-یاغیشلار ، سنه یاغان
آنا یوردوم  آذربایجان


قول-قانادیم ، هوسیم سن
یورولمایان ، نفسیم سن
من اوره یم ، قفسیم سن
منه دایاق ، کومک دوران
آنا یوردوم ، آذربایجان


من قوش اولسام ، سن پریم سن
زرگر اولسام ، سن زریم سن
عاشیق اولسام ، دیل بریم سن
عاشیق لری ، سای سیز اولان
آنا یوردوم  آذربایجان


گوزل لرین ، گوزلی سن
داد لی-دوزلو مزه لی سن
شاعیرین شعر ، غزلی سن
آدین سنین ، دیلده قالان
آنا یوردوم ، آذربایجان

                                             رامین دوستومدان تشکورلر

یازان رافیق  | ثابیت لینک |

منه دلبر ، او کؤنول مولکونه سولطانیم بس
دین و دل وئرمه گه اول غارت ایمانیم بس
عاشق صادق اوچون محضر شاهید نه گرک ؟
منه اثبات جنون بو سر عریانیم بس
نه ایشیم واردی منیم ، سئیر گولوستانه گئدم
سئیر گولشن منه بو خلوت ویرانیم بس
نئیلیرم سیریمی هر ناکسه اظهار ائله ییم ؟
منه غم یار و رفیقیم دل سوزانیم بس
حور و جنت اولا من ایسته میرم یار اؤزومه
منه یار اولسا اگر اول گول خندانیم بس
چوخ دا تعریف ائله مه باغ بهشتی ، زاهید
کی اونون کوئی منیم روضه رضوانیم بس
بولبول و طوطی و قمری سنه ارزانی اولا
ای نباتی منه بو طبع سخندانیم بس
یازان رافیق  | ثابیت لینک |

... 87/02/29 10:17

گؤرنه دوشوب نامردلره دونیامیز

کابوس اولوب تمام شیرین رویامیز

گنده چکیب نامرد الی دریامیز

باغدا داها نغمه چکمیر قناری

ظلمت دوتوب بوتون گوشه کناری

 

داغ دیبینده آغلاییرلار بولاغ لار

یانیر آمما ایشیق وئرمیر چراغ لار

ناله سسین ائشیتمه ییر قولاغ لار

خالقیم گئنه گئدیب شیرین یوخیا

فرصت وئریر دشمن تورون توخیا

 

کولک اسیر خالق اوره یین دوندوروب

اولان قالان امید اوتون سؤندوروب

بیرچک لره آرزی کولون قوندوروب

الله قویما ظلم ائوی آباد اولسون

ظلمت بیزیم اؤلکه میزه یار اولسون

 

دشمن دی بو دوست پالتاری گئییب دیر

اؤزون خالقا مشفق چوبان دئییب دیر

ایندیه جک مین لر قویون یئییب دیر

یئرتجی قورت واختی دیر کی یئخیلسون

آصلان لارین الی آلتدا سئخیلسون
یازان رافیق  | ثابیت لینک |

یئر اوزونده بیر ائویم وار

پنجره سی گونشه

نغمه دئییب قوشلار قونار

پنجره مه همیشه

 

 

یئر اوزونده بیر ائویم وار

مین زحمت له قورموشام

اوردان ایکی کؤرپه قارتال

بویودوب اوچورموشام

 

یئر اوزونده بیر ائویم وار

اوجاقی دائیم یانار

اونون سؤنمز شعله سیندن

اورییم ایشیقلانار

 

یئر اوزونده بیر ائویم وار

خاطیره لر مسکنیم

ایلقاریندا دوز اولانا

آچیق دیر قاپیم منیم

 

 

یئر اوزونده بیر ائویم وار

اوردا نئچه ایللر دیر

طالعی بیر آرزوسی بیر

ایکی شاعیر عمر ائدیر

 

یئر اوزونده بیر ائویم وار

اوردا غمیم سئوینجیم

اوردان قدر ال چاتمایان

ایل لره عمور کؤچوم

 

azərbayjan

یئر اوزونده بیر ائویم وار

سانکی خیالا دالمیش

او منیم ایچون ان مقدس

ایستی آشیان اولموش

 

 

 

یئر اوزونده بیر ائویم وار

باتماز طوفان لار اونا

بینؤره دن باغلی دیر او

بو وطن تورپاغینا ...

بو وطن تورپاغینا ...

 


یازی نین آردی
یازان رافیق  | ثابیت لینک |

اینجی سوز ... 87/02/23 13:32
ساوالان اولاق اوجا اولاق آشمیاق

دنیز اولاق دالغا اولاق داشمیاق

ایلان اولاق افعی اولاق ساژمیاق

مرد اولاق سوز دانیشاق قاشمیاق

یازان رافیق  | ثابیت لینک |

شفای وصل قدرین ، هجردن بیمار اولاندان سور
زلال ذوق شوقون ، تشنه دیدار اولاندان سور

لبین سرین گلیب گفتاره ، من دن اؤزگه دن سورما
بو پنهان نکته نی بیر واقف اسرار اولاندان سور

گؤزو یاشلی لارین حالین ، نه بیلسین مردم غافل ؟
کواکب سرینی ، شب تا سحر بیدار اولاندان سور

خبرسیز اولما فتان گؤزلرین قیدین چکن لردن
خبرسیز مست لر بیدادینی ، هشیار اولاندان سور

غمین دن شمع تک یاندیم ، صبادان سورما احوالیم
بو احوالی شب هجران ، منیم له یار اولاندان سور

خراب جام عشقم ، نرگس مستین بیلیر حالیم
خرابات اهلینین احوالینی ، خمار اولاندان سور

محبت لذتین دن بی خبر دیر زاهد غافل
فضولی ، عشق ذوقون ، ذوق عشقی وار اولان دان سور

یازان رافیق  | ثابیت لینک |

آخار چای لارین یولی اوسته داشلار اولماسایدی سویون سسی گوزل اولمازدی !

اوره ک ایستی اولسا سویوق قیش لاردا ایستی اولار ...

یازان رافیق  | ثابیت لینک |

86/12/21 10:41

Novruz bayraminiz mubarək

یازان رافیق  | ثابیت لینک |