هر گون اؤزومو سوپوروب آتیرام ائودن چؤله ...
کول قابیمداکی اؤلموش سیقارئت جسدی کیمی اؤلورم هر گون ...
من دوغولاندا بیر ملک اؤلموشدو بیر اوشاغین قلبینده ...
ساحيلده سو ایتی جسدلری وار ایدی اوندا ...
بالاجا ایدیم، بیر فینجانیم وار ایدی
رنگلی، باپبالاجا ...
او دا اؤلدو دونن گئجه ...
چیرپدی اؤزونو الیمده ن یئره
دؤزمهدی ...
چیخیب گئدهجم بورالاردان ...
گؤتورمهیهجم یاریمچیق یازیلاریمی،
ان سئودیگیم فینجانیمی ...
بیر بوغچایا ییغیب خاطرهلریمی،
آتاجام محلهمیزده کی زیبیل یئشیگینه ...
یئنه ساچلاریمی دیبینده ن ووردوروب،
ننه مین یایلیغی،آتامین گولوشو،آنامین سسی اوچون
داریخماغیمی گؤتوروب گئدهجم...
اونو تانیدیغیم گون گئیدیگیم کؤینك ین بیر دویمهسینی،
سئودیگین هر ماهنیدان بیر نوت گؤتوروب گئدهجم...
من گئدیرم غوربت ائله
سن سالامات قال آ داغلار
حالاللیق وئر قوی قالماسین
اؤره ییمده خال آ داغلار
هانی منده دؤزوم سن سیز
سؤنه جکدی کؤزوم سن سیز
قان تؤکه جک گؤزوم سنسیز
اولاجاغام لال آ داغلار
دوستوم یاریم کئچیر گئنده ن
دردیم آرتیر گؤنو گؤنده ن
منی غمده ن، غمی منده ن
آل آ داغلار، آل آ داغلار
گؤنش گزیب یورولاندا
سازین سیمی قئریلاندا
گؤیده قارتال وورولاندا
منی یادا سال آ داغلار
قایالاری اله دؤندر
جئغیرلاری تئله دؤندر
شجاعتی کؤله دؤندر
بیر کرمی چال آ داغلار
بو دونیانی اونودارام
گولوم سنین قوجاغوندا
بیهوش اولوم قوی لال اولسون
دیلیم سنین قوجاغوندا
تاپسا منی قضا قدر
عؤمروم گونوم گئتسه هدر
خوش دور منه چکسم اگر
ظولوم سنین قوجاغوندا
یا وعده نی بو یازا وئر
یا بهمنی گؤدازا وئر
هئچ اولماسا ایجازا وئر
اؤلوم سنین قوجاغوندا
اولو تانری یا شوکورلر اولسون کی منه بو وبلاگی یاراتماغا ایمکان وئردی بلکه گؤزه ل آذربایجانیمیزی اوجالتماق یولوندا بیر دستک اولسون . منیمجه بیزلره گره کدیر کی آذربایجان ایگیت ائلیمیزی ، آذربایجان شیرین دیلیمیزی ، آذربایجان معنالی ادبیاتیمیزی و آذربایجان دویغولو موسیقیمیزی قورویوب ایندیکی و بیزدن سونراکی نسیل لره یئتیره ک . من بئله ظن ائدیرم کی هر کیمسه آنادیلینی و آنا توپراقینی دانسا ، کئچه جک و گله جک نسیللره بورجلی قالیر و بو بورجی هئچ زامان اؤده مک اولماز . سئوینیرم کی من گئجیکسم ده بو گون باشلاییرام . سیزدن ده ایسته ییم بودور کی منیم بو یولدا الیمدن توتوب کؤمک چیم اولاسیز .